قلب أم

أنا مش حساكي بنتي  
أنا حاسه قلبك قلب أم 
بنتي ياللي شايله همي 
وانتي اللي مسمياني أم 
لما تبقي معايا وجنبي 
 مش باشيل للدنيا هم 
بنتي انتي أمي صاحبتي 
شايله عني حاجات كتيره 
أسراري وذكرياتي 
شايله مني صفات كتيره 
أولها إني كنت أم لبيت صغير 
 حتي قبل ماأبقى أم 
شايله مني حبي خوفي  علي كل حد 
بيعيش معايا وجنبي وحتي لو كان بينا بعد 
ينام كل اللي جنبك وانتي اللي صاحيه 
تطمني وتقربي من كل واحد تطمني بيتنفس ؟
يعني عايش يعني لسه في أمل 
يفضل في بيتنا بكره حب 
اوصف بإيه ولابإيه قلبك وحبك رقتك 
هو لسه في معاني الوصف وصف 
انا بس باقلق عليكي من قلبك
 اللي محيرك علي كل حد 
خلي بالك منك شويه اوعي تستحلي التعب 
أوعي تنسي نفسك وسط قلقك علي كل حد 
عايزاكي تبقي أقوي اتحملي 
يوم ماتطمنيش علي حد 
اتحملي انك تبقي جوا دايره اهتمام اي حد 
لسه الايام جايه كتيره
يارب حقق دعايا ليكي 
يعطيكي إنسان  يفهمك 
يحبك يتحمل قلبك اللي شايل هموم كتيره 
مش بتاعتك بتاعة كل اللي جنبك 
واللي اتعودا يرموا عليكي حملهم
 وانتي بتشيلي ومابتشتكيش لحد 
يارب أعيش وأشوف بنتك اللي هي هتبقي أمك 
اصل البنات مابيطلعوش لأي حد 
بيكونوا ذي أمهم 
صغيرين بقلوب كبيره تساع الناس كلها 
وتشيل هموم اي حد 
وتلف في قوض البيت تعد انفاس اللي نايم 
تطمن لسه عايش ؟ 
يعني لسه في أمل يفضل في بيتهم بكره حب 
عايزاكي تفضلي لسنين كتييير صغيره
 ماتستعجليش الزمن تكبري 
عايزه لسه أدلعك وأجيبلك كل حاجه 
باحبها ليكي وتسعدك 
أصل مافيش قلب ذي قلبك يستاهل 

أسعده غير قلب أمي 

اللي كنت  ولازلت ليها أم 
وقلبك انتي قلب بنتي اللي انا باسميها أم 
       
          منال الخميسي